UK-in vaccine programme kalpui ṭan ta

United Kingdom (UK) chuan Covid-19 vaccine atana a lo pawm tawh, Pfizer/BioNTech siam vaccine chu a pe chhuak ṭan ta. 

Nimin zing khan Coventry-a hospital pakhatah kum 90 mi, Margaret Keenan chu vaccine hi pek a ni a, khawvela  Pfizer COVID-19 dawng hmasa ber a ni. 

Health secretary Matt Hancock chuan ram chhunga hospital 70 aṭangin vaccine programme hi neih a ni dawn tih a sawi. 

Health official-te chuan vaccine dose 8,000 chu kum 80 chung lam leh nursing home worker-te  hnenah pek hmasak a ni dawn tih sawiin, mipui nawlpuite chu dawhthei taka lo nghak turin an ngen. Mi maktaduai 67 vel awmna, UK hian vaccine hi dose maktaduai 40 a order lawk tawh a ni.