United Nations-in Yemen-ah healtcare centre titlem

United Nations (UN) chuan Nilaini aṭang khan hna thawhna tur sum a hmuh ṭhat tawk loh avangin  Yemen-a healthcare centre 300 chu a titawp rih. A dang pawh tihtawp belh a la ngai maithei tih a sawi bawk. 

Funding an hmuh ṭhat loh bakah hian mi retheite hnena chaw sem chhuah pawh tihtlem a lo ni tawh  bawk. Kumin April -August thla chhung hian Yemen-a UN humanitarian programme pawimawh tak tak hmun thuma ṭhena hmun khat chu tihtawp a ngai a ni. 

Yemen-a UN humani­tarian coordinator Lise Grande chuan US dollar vaibelchhe 3.2 mamawh a nih thu a sawi a, mahse heta ṭang hian  USD vaibelchhe khat chiah an hmu a, hei vang hian UN hnuaia healthcare centre bakah UN humanitarian programme pawimawh tak tak te chu tihtawp a lo ngai ta a ni, a ti.

Lise Grande chuan Yemen ram hian ṭanpui a mamawh tak zet thu a sawi a, "Kan mamawh ang thil te kan neih loh chuan harsatna lian tham zawk tawkin kan chungah thihna hial pawh a thleng thei a ni, chuvang chuan ṭanpui kan mamawh tak zet a ni," tiin a sawi. 

Kum ruk chhung tual­chhung indona a thlen tawh avangin Yemen ram hi a tlachhe zual hle a, mi tam tak thiin dinhmun rethei taka ding mi tam tak an awm bawk. Thi zingah hian civil mite an tam ber a ni. 

Grande chuan Yemen rama cheng hmun li a ṭhena hmun thum chuan ṭanpui an mamawh thu sawiin, heng mite hi maktaduai 24 vel an nih thu a sawi. 

Funding an dawn ṭhat loh chungchang sawiin, Grande chuan Arab donors zingah chuan Saudi Arabia chuan Yemen ṭanpuina pek lo intiam tawh mah se, a pe ṭha tawk lo tih a sawi. Hei vang hian SArabia chuan sawisel pawh a hlawh phah hle.