Australia-ah whale 50 chhanchhuak

Australia chhim lam, Macquarie Harbour-a whale tangkhang zinga 50 chu chhanchhuah an ni a, hetihlai hian 380 vel an thi thung. 

Tasmania khawthlang lam tuipui kamah whale tangkhang zinga a tam zawk chu an thi a, Tasmania Parks and Wildlife Service manager Nic Deka chuan thi zat an hriatchian theih tawh hi 380 an tling tawh tih a sawi. 

Whale tangkhangte hi Thawhṭanni khan hmuh a ni a, chhanchhuah tumin theihtawp chhuah zui a ni. Mahse an awmna hmun hi lawng hmang chauha kalpawh theih a nih avangin hna thawh pawh a hautak hle. 

Conservationist, skilled volunteer leh tualchhunga fish farm-a thawk mi 60-te chuan chhanchhuah hna hi an thawk a ni. A dam an chhanchhuahte chu lawnga special sling an dah hmangin tuifinriat lamah hruai an ni. 

Nungdama la awm, whale dang 30 pawh chhanchhuah leh tumin an bei mek a ni. Whale tangkhangte hi tuipui kam mel ruk huam chhungah hmuh an ni a, official-te chuan tangkhang dang an awm em tih zawngin an zawnna huam chin pawh an zauh belh zel thu an sawi.