US-in Israel-ah THAAD missile defence system a thawn dawn ta

United States chuan Israel leh Iran inkar boruak chhe zelah, Iran beihna laka Israel a invenna kawnga pui turin advance anti-missile system, Terminal High Altitude Area Defense (THAAD) a thawn dawn ta a, sipai eng emaw zat a tir tel bawk ang.

Pentagon hotu, Lloyd Austin chuan chuan Pathianni khan Israel air defence thuam chakna kawnga pui turin THAAD missile defence system thawn turin thupek hi a tichhuak ta tih Department of Defence chuan a sawi a, a enkawltu tur US sipai 100 pawh tirh an ni dawn bawk tih a tarlang.

Thuchhuah siamin Pentagon chuan, THAAD Battery an thawn hi Iran-in ballistic missile hmanga a beihna thleng palh thut ah Israel-in a ram venhimna tura a hmalaknaah US-in a pui zel dawn tih lantirna a ni a, hei bakah Israel-a America mite venhimna tur a ni bawk a ni," a ti. THAAD system an thawn luh hun tur tak hi sawilan a la ni lo.

Hetih lai hian Iran foreign minister Abbas Araghchi chuan US-in Israel a missile system a thawn a nih chuan a sipaite nunna a thap tihna a ni ang, tiin a vau ve thung. Aragchi chuan, "Middle East huam chhunga indona thleng mekte titawp turin theihtawp kan chhuah mek a ni a, kan mite venhimna tur hian tiam chin kan nei dawn lo," a ti.

THAAD hi altitude sang taka ballistic missile thlawk lai kap thla thei tura duan a ni a, short-medium leh intermediate-range missile pawh kap thei a nih avangin, missile defence huamzau tak a ni. Km 150-200 ah target hi a fuh thei a, target a fuh rate hi 100% dawn a tling. THAAD battery tinah hian truck-mounted launcher paruk, interceptor leh radar paruk awmin, sipai 95 velin an enkawl a ngai a ni. US-in anti-missile weapon a neih ṭhat ber zinga mi niin, kum 2009 khan THAAD battery hi Israel-ah exercise neihna turin a lo thawn tawh bawk.

Israel hian anti-missile system hi Israel-a Rafael Advanced Defence system leh US defence company lian, Raytheon siam David's Sling a nei a, Stunner leh SkyCeptor hit-to-kill interceptors hmangin, km 300-a hlaa target a fuh thei. Hei bakah hian US nena an siam, Arrow 2 leh Arrow 3 system an nei bawk. Level hniam ami kap turin Iron Dome defense system a nei bawk a ni.

Hezbollah-in IDF base an beihnaah Israel sipai 4 thi

Lebanon helpawl, Hezbollah chuan Pathianni zan khan drone hmangin Haifa chhim lam, Binyamina bula Israel Defence Force (IDF) base an bei a, Israel sipai pali an thi a, sipai pasarihin hliam an tuar.

Hezbollah hian IDF base beihna atan hian Mirsad-1 an hmang nia sawi a ni a, he UAV hi kum 20 chuang an lo hmang tawh ṭhin a ni. Mirsad-1 hian puakthei thil hi kg 40 thelng a phur thei a, darkar khata km 370-a chaka thlawkin, km 120-a hla a kap pha a ni.

Iran thlawp, Hezbollah helpawl hian kum 2002 aṭang khan an hmelmate enthlak leh beihna atan drone hi an lo hmang tawh a ni. Pathiannia IDF base an beih dawn hian Israel defence system tihbuaina turin Iran siam drone, Mohajer-2 tam tham tak an kap chhuak tel bawk.

Inrinni liam ta, Israel holiday Yom Kippur ni khan drone hmangin Israel hi beih a lo ni tawh bawk a, Tel Aviv khaw dai kah a ni a, thil tih chhiat nei mahse thi leh hliam erawh an awm lo.

Israel defence minister Yoav Gallant chuan Hezbollah drone vanga an sipai pali thihna thleng chu an zirchiang a, an sipai beitute chu zirtirna an pe ngei dawn tih a sawi. Minister hian nimin khan Hezbollah te pawikhawihna thlenna hmun hi a tlawh nghal a ni.