UN-in Gaza-a inbeihna chhuina report a tichhuak
United Nations chuan nikuma Gaza Strip-a UN school beih a nih dan a chhuina report chu Thawhṭanni khan a tichhuak a, Israel sipaite'n UN school pasarih an kahnaah Palestinian mi 44 an thi a ni, a ti. Hemi rual hian Palestinian helpawl, Hamas-te chuan UN school pathumah ralthuam an chhepru tih hmuhchhuah a ni tih a tarlang bawk.
Nikuma Gaza Strip-a Israel leh Hamas-te ni 50 chhung an inbeihnaah khan mi 2,260 an thi a, an zinga mi 2,189 chu Palestinian mi niin, civil mi 1,486 an tel a, Israel sipai 67 leh civil mi paruk an thi bawk.
UN chuan Gaza Strip-a inbeihna thlenga civil mi tak tam thihnaah Israel leh Hamas-te chuan mawh an phur ve ve a ni, a ti.
UN Secretary-General Ban Ki-moon chuan nikum November thla khan UN agency for Palestine refugee-te enkawl, UN school beih a nih dan chu independent board of inquiry-in a chhui tur thu a lo sawi tawh a ni. UN report hi phek 207-a chhah a ni a, report kimchang erawh puanzar a ni lo.
Report-in Israel sipaite'n mortar hmangin UN school-te chu an kap a ni tia a tarlan chu sawi chhunzawmin, Ban Ki-moon chuan indona hlaua UN school-a himna zawnga tlanchhiate beiseina chu tihchhiatsak a ni, a ti. Palestinian helpawlte'n UN school-te ralthuam dahna atana an hman chuan dinhmun derthawngah a dah phah tih a sawi. Report-ah hian UN school pahnih aṭang hian helho hian Israel-te chu an kap a ni tih tarlan a ni bawk.