Baltimore-ah emergency puang

US, Maryland-a Baltimore khawpuiah police kuta a awm laia mihang pakhat a thih avanga lungawi lohna lantirnaa tharum thawhna a thlen zui avangin state of emergency puan a ni.

African American Freddie Gray (25) chu April 12 khan West Baltimore-ah police-te'n an man a, police van-in station panpui a ni. Station thlenpui a nih hian a kal ṭha thei lo a, thawk lamah pawh harsatna a nei a ni. April 19 khan spinal cord injury avangin a thi zui ta a ni.

Gray-a chunga thil thleng vang hian Baltimore khawpuiah mihang te'n lungawi lohna nasa taka lantirin police-te an bei a, Thawhṭanni khan tharum thawhna nasa tak a thleng zui a ni. Lungawi lohna lantirtute hian in te an hal bakah dawrte an rawk a, kawtthlera motor dingte an suasam bawk a, police-te nena an innawrbuainaah police officer 15 in hliam an tuar.

Maryland Governor Larry Hogan chuan Thawhṭanni khan emergency puangin, nizan aṭang khan khawpui chhungah kar khat chhung zan lama curfew puan a ni. Hei bakah hian venhim hna thawk turin National Guard tirh luh an ni bawk.

US Justice Department chuan Gray-a thih dan hi a chhui chiang mek a, police officer paruk chu hrem an ni tawh a ni.

Police-te'n Gray an man chhan tak hi hriatchian a ni lo a, mihang lungawi lote chuan police-te hian mingo leh mihangte an thliar hrang nasa hle tia puhin, mihang an rinhlelhte chu chhan mumal awm loin an tiding a, an man mai zel niin an sawi.