Taliban sorkarin nunna nei thlalak tih chhuah a khap dawn

Afghanistan-a rorel lai, Taliban sorkar hnuaia morality ministry chuan news media lam khuahkhirhna khauh tak, nunna nei thlalak leh video tih chhuah khapna siam a tum. He dan hi hman thuai a nih tur thu a sawi bawk.

Taliban sorkar hian tun hnaiah Islam dante chu khauh taka kalpui a nih tur thu a puang a, hemi behchhan hian media lam khuahkhirhna tur dan hi a siam thar a ni. Ministry for the Propagation of Virtue and the Prevention of Vice (PVPV) thupuangtu, Saiful Islam Khyber chuan nunna nei thlalak thehdarh leh tih chhuah hi Islam law nen a inkalh tih pawh official-te chuan mipui an ziritr dawn a, an rilru pawh hmin an tum dawn a ni, a ti.

Dan thar siam turah hian nunna nei thlalak tih chhuah khap bakah, Islam sakhua nuihzat leh fiamthu thawhna atan hman te, Islamic law sawiselna lam tih chhuah khapna pawh a tel.

Taliban hian Afghanistan-a thuneihna an chan hmasak, kum 1996-2001 inkar khan ram pumah nunna nei thlalak te chu TV leh chanchinbua tih chhuah an lo khap tawh a, mahse tun ṭuma sorkarna an siam leh hnuah hian khap hrang hrang siam mahse he dan hi an la hmang tel lo. Mahse morality ministry chuan khapna hi hman chhoh leh a tum ta a ni.