EU-in Iran firm leh mi mal hrekna a siam

European Union chuan Iran-a firm leh mi mal ṭhenkhat chu Russia hnena drone leh missile an thawn kaihhnawihah a hrek. Mi mal hrek zingah hian Iran deputy defence minister pawh a tel.

European Council chuan Thawhṭanni khan thuchhuah siamin, mi mal pasarih bakah firm eng emaw zat chu Ukraine dona atana Russia hman tur ralthuam leh hmanruate thawn an nih chungchangah hrek an ni, a ti. Heng an mi hrekte hi EU huam chhunga an thil neihte khawih chet theih loh dah sak an nih bakah an zin khap an ni bawk.

Iran deputy defence minister Seyed Hamzeh Ghalanda, Islamic Revolutionary Guard Corps' Quid Force-a high-ranking member bakah, Iran airline pathum, Iran Air telin hrek zingah hian an tel.

European Commission president Ursula von der Leyen chuan hrekna siam a ni chu lawmawm a tih thu sawiin, "Iran sorkar-in Ukraine do mektu, Russia a pui hi pawmzam mai theih a ni lo a, a tihtawp a ngai a ni," a ti.

Hetih lai hian Iran foreign ministry thupuangtu, Esmail Baghaei chuan Russia hnenah missile an supply loh thu sawiin, EU-in hrekna a siam chu international law kalh a ni, tiin a sawi. Europe ram ṭhenkhat leh UK chuan finfiahna engmah nei loin buainaa hian Iran hi inrawlhah an puh niin a sawi.

UK hian Thawhṭanni khan Iran-in October 1-a ballistic missile hmanga Israel a beih avangin Iran sipai hotute hrekna a lo siam tawh bawk. UK-in a hrek zingah hian Iran army-a commander-in-chief Abdolrahim Mousavi, leh air force hotu Hamid Vahedi pawh an tel.