Gaza-ah chhawmdawlna tam zawk luh tir turin US-in Israel hnenah ni 30 chhung hun a pe

United States chuan Israel sorkar hnenah lehkha thawnin, Gaza Strip-a indo tuartu, civil mite chhawmdawlna tam zawk luh tir turin a hriattir. Hemi atan hian ni 30 chhung hun pein, an ngenna hi an zawm lo a nih chuan Israel sipai puihna a pekte pawh tihtawp ṭhenah a vau bawk.

He lehkha hi Pathianni khan US secretary of state Antony Blinken leh defence secretary Llyod Austin chuan Israel defence minister Yoav Gallant hnenah thawnin, Israel-Gaza indona a thlen hnua Israel hnena vauna a pek nat ber nia sawi a ni. Israel hian Gaza hmar lamah beihpui a thlak thar leh avanga civil mi tam tak thihna a thlen avangin, US chuan he hriattirna hi a pe a ni. Lehkhathawn hi mimal an inthawn, tih tlangtlan loh tura tih ni mah se, media lamah a darh ta tho a ni. US state department thupuangtu, Matthew Miller chuan lehkhathawn tlangzarh a nih chungchangah Israel official lam a inrawlh nia a lan thu a sawi.

US chuan indona avanga civil mite tawrhna nasa leh dinhmun chhe zel chu ngaihven a ngai takzet tih a sawi. Israel-in chhawmdawlna thawn chungchang ṭha zawka kalpui a tiam chungin, September thla khan Gaza-a chhawmdawlna thawn luh hi 50% chuangin a tla hniam niin Blinken chuan a sawi.

Israel pawhin US ngenna hi a ngaihtuah a, hma lak an tiam niin official chuan a sawi. Gaza hmar lama beihpui an thlaknaah hian Hamas firfiakte chauh bitum an nih thu pawh a sawi nawn leh bawk a ni.

Blinken leh Austin chuan an lehkhaah hian Israel chu ni khatah Gaza-ah hian chhawmdawlna tur phurtu truck 350 zel luh phalsak turin an ngen a, hei bakha ramri kaltanga inkalpawhna chu panga hawng turin an ti bawk. Ni 30 chhunga hma la tura tiin, an hma lak dan hi November 5-a US President thlanna neih hnuah an ennawn leh ang. Israel hnena ni 30 chhunga tipuitling tura ngenna an siamte hi kumin thlasik hma ngeia chhawmdawlna tam zawk luh phalsak, Jordan ramri kaltlanga chhawmdawlna luh tir leh Gaza hmarlam an hualbehna tihtawp te a tel.

US hi Israel ṭantu leh thlawptu niin, Israel-Hamas indona a chhuah hnuah pawh Israel sipaite pawh kawng hrang hrangin a pui nasa hle. Mahse Gaza-a beihpui a thlak chungchangah hian Israel chu warning a pe fo a, president Joe Biden pawhin Israel sipaite chu beihpui an thlaknaah civil mite tawrhna thlen lo turin vawi tam tak chahin a vau bawk a, mahse Israel sipaite an puihna erawh vawi khat ralthuam thawn tur an tikhawtlai tih loh chu a taka hma lakna an la nei lo.

Israel chuan Gaza-a chhawmdawlna thawn luh leh, chhawmdawl hna thawhna kawngah khuahkhirhna an siam lo niin a sawi a, UN agency zawkte chu mipuite mamawh sem kawngah an thawk tho niin a puh. Hamas firfiakte chuan civil mite chhawmdawlna tur thawn luhte chu an lo ruksak ṭhin niin a sawi.