NKorea-ah sipaia luh dil mi mtd 1.4 awm

North Korea state media chuan tun kar chhungin sipaia ṭan duh, dilna thehlut mi maktaduai 1.4 an awm tih a tarlang.

NKorea hian a ṭhenawm, South Korea chu drone hmanga an ram chhunga NKorea sorkar sawiselna leaflet thawn luta a puh hnuah Korea ram pahnihte inkar boruak hi a chhe zual hle. NKorea hian Thawhlehni khan ramri bula ram pahnihte inkalpawhna rel kawng leh kawngpui ṭhenkhatte a lo bomb chhe tawh bawk a ni.

KCNA news agency chuan sipai luh duha petition sign-tu zingah hian zirlai leh youth league official ṭhahnem tak an awm tih a sawi a, an ram tihchhiat tuma beitute do let an duh a ni, a ti.

Nikum khan US nena an inep avangin sipaite pui turin volunteer 8,00,000 zet an inpe niin KCNA chuan a lo sawi tawh a, kum 2017 khan mi mtd 3.5 zet sipaite pui turin an lo inpe tawh bawk niin a tarlang.

International Institute for Strategic Studies (IISS) in a tarlan danin, North Korea hian sipai hi mtd 1.2 neiin, reservist 6,00,000 a nei mek. Hei bakah hian unarmed unit eng emaw zat neiin heng hian Worker/Peasant Red Guard reservist mtd 5.7 vel an awm bawk.