China aṭangin US-ah panda pahnih thawn

China chuan international 'panda diplomacy' campaign a kalpui mekna hnuah, Thawhlehni, October 15, 2024 khan US-ah Washington zoo-ah panda pahnih, a nu leh pa a thawn.

Panda pa, Bao Li leh a nu, Qing Bao te hi kum thum ve ve niin, Chengdu aṭangin FedEx Boeing 777F cargo plane, 'Panda Express' tia sawiah thawn an ni a, Virginia-a Dulles airport-ah ṭumpui an ni. Heta ṭang hian truck hmangin an awmna tur, Washington-a Smithsonian National Zoo panpui an ni. Zoo-ah hian ni 30 aia tlem lo khung hran an ni phawt dawn a, January 24, 2025 hma chuan mipui hmuha pho lan an ni lo ang.

Contract an lo ziah tawh angin US-a panda awm zawng zawng deuh thaw chu China-ah thawn an ni a, National Zoo-a panda pathum awmte pawh nikum November thla khan China-ah hian thawn a ni.

China hian kum 1972 aṭang hian 'panda diplomacy' hi a kalpui a, hemi kum hian US president hlui Richard Nixon-a'n a president laia China ram a tlawh hnuah thilpek atan panda hi an lo thawn tawh a ni. Nikum Novembr thlaa US president Joe Biden leh China president Xi Jinping-ten California-a summit an neih ṭum khan, President Xi chuan China leh America mipuite inṭhianṭhatna lantirna turin panda hi an thawn leh dawn tih a lo sawi a ni.

Kumin August thla khan San Diego Zoo tan pahnih an thawn a, hei hi kum 21 hnuah China-in US hnena panda a thawn lehna hmasa ber a ni bawk.