Nepal lirnghinga thite ni 3 chhung sún dawn

Nepal sorkar chuan April 25-a an rama lirnghing rapthlak tak thleng vanga thite sunna chu nimin aṭang khan ni thum chhung hman a nih tur thu a puang. Hriat theih chinah lirnghing vanga thi hi mi 5,000 an tling tawh.

Prime Minister Sushil Koirala chuan lirnghing tuarte chhawmdawl leh chhanchhuah hna chu sorkarin theihtawpin a thawk tih a sawi a, hemi rual hian chhiatna thleng hi a nasat em avangin tih tur a tam hle, a ti.

Lirnghing tuarte chhanchhuah hna hi ngawrh taka thawh chhunzawm zel ni mah se, ruah a sur chhunzawm reng avangin an thawk chak thei lo a, hei bakah hian pawn lama riak mi tam takin harsatna a thlen belh nasa hle.

United Nations chuan lirnghing tuarte hi district 39-a mi maktaduai riat vel niin a chhut a, hei hi Nepal ram mipui hmun li-a ṭhena hmun khat aiin an tam. Chhiat thleng vanga hliam tuar hi 10,000 chuang an tling tawh bawk.

Nepal official-te chuan chhiat­na rapthlak tak an tawrk meka an hmalak danah tihsual an nei tih an pawm thu an sawi. Tun thlengin sorkar hian kar kalta Inrinnia lir­nghinga chhiatna thlen dan kimchang chu a la hre thei lo a, khawvel ram hrang hrang aṭangin chhawmdawlna lut mah se, tlangrama chengte chu an la kalpawh thei lo. Heng mite tan hian helicopter hmangin puan in, ei tur leh damdawite thlaksak an ni.

Nepal Communication Minister Minendra Rijal chuan, "Vawiin aṭangin kalphung ṭha zawkin kan kal tawh ang," tiin nimin khan a sawi.