Indonesia-in ruihhlo tawlhrutu mi pariat a tihlum

Indonesia chuan an rama ruihhlo tawlhrua puha thiam loh a chantir mi pariatte chu a tihhlum a, ram hrang hrangte'n an sawiselna chu chhanglet­in, ruihhlo doletna tura an beihna kawng khat a nih thu a sawi.

Ram dangte'n mi tangte tihlum lo tura an ngen chungin, Indonesia Attorney General Muhammad Prasetyo chuan an ram tana thil hlauhawm a nih avangin ruihhlo kaihhnawiha pawikhawihte tihhlum chu tih ngei a ngai a ni, a ti. Thiam loh chantirte tihhlumna chu ruahman lawk ang taka kalpui a nih thu a sawi bawk.

"Mi tihhlum hi thil nuam a ni lo a, hna thawh chakawm tak pawh a ni lo. Mahse ruihhlo hlauhawm laka kan ram chhanhim turin hei hi kan tih a ngai a ni," tiin Prasetyo chuan a sawi.

Thawhlehni zan, zanlai pelh hretah khan thi tura an chungthu an lo relsak tawh, mi pakua zinga pariatte chu Nusakambangan thliarkar Pasr Putih tan-in pawnah firing squad member-te'n an kap­hlum a ni. Philippine hmeichhe pakhat tihhlum tura tih erawh chu Philippines President in a ngensak hnuah ṭhulh leh a ni.

Mi pariat kahhlumte hian kahhlum an nih dawn hian an mit tuam sak an duh lo a, an hun tawp dawn thlengin an zai ho niin tihhlum an nihna hmuna awm, pastor chuan a sawi. Kahhlum an nih hnu hian ambulance hmangin an ruang hi phurh chhuah a ni a, phum tura duh an thlanna hmun panpui an ni.

Indonesia-in mi pa­riatte hi Nigerian 4, Australian 2, Brazilian 1 bakah Indonesian 1 an ni. Australia sorkar chuan an mite tihlum lo tura a ngen chunga kahhlum an ni ta chu a lungawi lo hle a, a lungawi lohna lantir nan nimin khan Jakarta-a an ram palai an dah chu a ko haw. Australia Prime Minister Tony Abbott chuan mi tangte tihhlum an ni chu 'nunrawn thlak leh thil ṭul lo tawp a ni' a ti. Brazil President Dilma Rousseff-i pawhin Indonesia sorkar thiltih dan chu a dem thu sawiin, hei hian ram pahnihte inlaichinnaah nghawng a nei dawn tih a sawi bawk.