Saudi Arabia lal-in crown prince a thlak
Saudi Arabia lal, King Salman chuan nimin khan a aiawh tur, Crown Prince atana Moqren bin Abul Aziz bin Saud a ruat chu thlakin, a aiah Interior Minister Mohammed bin Nayef a ruat.
Royal court chuan thuchhuah siamin, lal-in a duhdan angin Crown Prince hi thlak a ni a, deputy prime minister a nihna pawh hlihsak a ni bawk tih a sawi. Thuchhuahah hian 'Prince Mohammed bin Nayef chu Crown Prince atan ruat a ni' tiin, deputy prime minister atan ruat nghal a nih thu a sawi a, hemi rual hian interior minister bakah, political and security council hotu nih pawh a chhunzawm ang.
Kumin January 23-a Saudi lal, King Abdullah a thih khan King Salman hi lal atan dah a ni a, King Salman hian a aiawh turin kum 69, Mogren hi a ruat ve leh nghal a ni. Moqren hi Saudi Arabia lalram dintu, Abul Aziz bin Saud fapa naupang ber a ni. Mahse thlak a nih leh tak avangin, Mohammed bin Nayef hi Abul Aziz-a tute zinga lal dinhmun luah thei hmasa ber a ni dawn a ni.
King Salman hian a fapa, Prince Mohammed bin Salman chu deputy crown prince atan a ruat bawk.