Sri Lanka-in President thuneihna khuahkhirh dawn

Sir Lanka Parliament chuan an ram President thuneihna khuahkhirhna tur bill a pass.

Thawhlehnia parliament inkhawm­ah Prime Minister Ranil Wickremesinghe chuan constitutional amendment bill hi a pu lut a, member 225 zinga 215 in an thlawp. Ram danpui siamṭhatna tur bill putluhah hian President-in judge, police leh public official ruat tura thuneihna a neihte tihtawpsak a ni a, police leh judiciary-te chu independent commission a dah an ni.

Parliament-a bill pass-ah hian President term chu mi pakhatin ṭum hnih bak chelh theih loh tura duan a ni bawk a, hei vang hian President Rajapaksa chuan inthlan a chuh thei tawh lo ang. Rajapaksa hian a term thumna atana inthlan chuh leh a duh avangin kum 2010 khan President-in term hnih chauh a chelh theihna dan chu a lo hnawl tawh a ni.

Kum 2010-a Tamil hel hneh an nih hnu khan, Rajapaksa hian ram danpui siamṭhain, thuneihna tam zawk a inpe a ni. Hei hian sawi a hlawh hle a, eirukna leh mihring dikna chanvo palzut chung­changah pawh inrawlha puhna a tam hle.

Dan siamṭhatah hian President-in a term, kum nga-a kum li leh a chanve tal a hman tlin loh chuan parliament ṭhiat tura thuneihna a neih pawh tihtawp a ni bawk. A hma chuan President hian kum khat a hman tlin tawh chuan parliament hi a ṭhiat thei a, hei hi President-in amah dodaltute paihthla a, a dinhmun sawhnghehna atan remchangah a hmang thei a ni.