Washington-ah Nagorno-Karabakh chung changa inbiakna nei dawn
Nagorno-Karabakh inchuha indo, Armenia leh Azerbaijan ram chuan an foreign minister ve ve te chuan naktuk hian Washington-ah US Secretary of State Mike Pompeo an hmu dawn a, a hranin an hmu dawn nge a rualin inbiakna hi neih a nih dawn erawh sawichian a ni lo.
US State Deparment chuan inbiakna neih tur chungchang hi a puangzar lo a, mahse September 27 aṭanga ram pahnihte indo a, mi tam tak thihna a thlen hnuah an inkar boruak siam ṭhat tum hian hma a la zui reng a ni.
Armenia leh Azerbaijan hian tun thla khan Moscow-ah inbiakna neiin, Nagorno-Karabakh-ah inkahhai pawh an lo puang tawh a, mahse an inremna thuthlung hi palzutin an la inbei chhunzawm reng tho a ni. Thawhlehni pawh khan an la inkap reng a ni.
Russia president Vladimir Putin leh France president Emmanuel Macron-te pawhin Thawhlehnia telephone-a an inbiaknaah Nagorno-Karabakh chungchang hi sawiin, Armenia leh Azerbaijan chuan remna kawng zawnga inbiakna nei chhunzawm leh se an duh thu an sawi.
Nagorno-Karabakh hi international law hnuaiah chuan Azerbaijan ram angah pawm a ni a, mahse he bial hi Armenian lamin a thunun avangin ram pahnihte hian an inchuh reng a ni.
He bial hi Caspian Sea aṭanga ram danga oil leh gas pipeline kalkawng a nih avangin, buaina hi a punlun zel chuan international market thlengin a nghawng pawi thei dawn a ni.