Israel sipaiten Gaza-a beihpui an thlaknaah Oct 7-a Israel beihnaa bul tumtu Hamas hruaitu Sinwar a thi

Israel foreign minister Israel Katz chuan kum 2023, October 7-a Israel chhim lam beihna tura thupek tichhuak tu, Hamas hruaitu Yahya Sinwar (62) chu Nilaini, October 17, 2024-a Israel Defence Force (IDF) ten beihpui an thlaknaah a thi a, DNA test aṭangin amah ngei a ni tih tihchian a ni tawh niin nimin khan a sawi.

IDF hian Gaza-a beihpui an thlaknaah mi pathum an thi tih an sawi a, hemi hnu hian Minister Katz chuan an zinga pakhat chu Sinwar a nih thu a rawn puang a ni. 'Mi tam tak thattu, October 7-a Israel beihnaa mawphurtu ber, Yahya Sinwar chu IDF sipaiten an that ta," tiin thuchhuah a siam a ni.

Sinwar thih thu tihchian a nih hnu hian Israel prime minister Benjamin Netanyahu pawhin video ti chhuakin, Israel beih a nih chungchanga a mawhphurtu ber thah ni mah se, Hamas firfiak leh an mi hren mekte chhanchhuak tura an beihna chu a la tawp lo tih a sawi zui nghal a ni. Hamas mi hren mekte tan thuchhuah siamin, an chhungte leh an mi hmangaihte chu an in lum ngeia an kir leh theihna turin tha tawp chhuahin an bei zel dawn tih a sawi.

Israel sipaite chuan Hamas hotu Sinwar thah a nih hmaa a hun hman dan hnuhnung nia sawi drone footage an ti chhuak bawk. He video-ah hian Sinwar hi ṭhuthlenga a thu lai, in chim bang chhung hnawk taka a awm lai a lang a, a tawpnaa thil eng emawa drone a vawm lai chu a lang bawk.

Tunge Yahya Sinwar ?

Kum 1962-a piang, Yahya Sinwar hi Hamas pawlah hian a founder, Sheikh Ahmed Yassin chuan la lutin, internal security 'Al Majd' an tiha hotuah a dah a ni. Islamic morality law bawhchhiate zawn chhuah leh hrem bakah, Israel sipaite thawhpui nia rinhlelhte dap chhuaha hremna pe ṭhintu a ni. Kumin July thlaa Israel sipaiten Iran-a Hamas hotu, Ismail Haniyeh an thah hnuah, August thla khan Hamas hotu atan hian thlan a ni. Kum 1998 khan Israel thawhpui nia puh Palestinian mi pali a thah vangin man a ni a, Israel tan-inah tangin, hemi chhung hian Hebrai ṭawng pawh a zir thiam a ni. Kum 2011 khan tang inthlengnaah Israel-in Palestinian tang a chhuah zingah a tel.

Haniyeh thih hnua Hamas hruaitu thar atana thlan Sinwar ruat a nih veleh, Israel chuan bitum leh nghalin, a awmna chin hrilh thei hnenah lawmman USD 400,000 lawmman a tiam nghal a ni. Mahse Sinwar hian Gaza-a leiverh hrang hrangah awmin, hun eng emaw chen chu Israel beihna lak aṭang hian a him a, a tawpah erawh a awmna hi an kap fuh thei ta a ni.

Hamas hruaitu thar tur tunge?

Yahya Sinwar a thih leh tak avangin Hamas hian hruaitu thar an ruat leh a ngai dawn a, an pawl hruaitu thar tura hming rinkai zingah hian Mahmoud al-Zahar, Hamas dintu zinga mi bakah Sinwar-a unaupa Mohammed Sinwar, Hamas political bureau-a senior member Mousa Abu Marzouk, Hamas military wing Izz al-Din al-Qassam Brigade-a commander Mohammed Deif, Hamas political bureau member Khalil al-Hayya leh kum 2006-2017 chhung Hamas hruiatu Khaled Mashal te an tel. Hamas hian Israel nen an indo chhunzawm reng avangin an pawl hruaitu thar hi an ruat fel thuai a ngai leh dawn a ni.

Hezbollah-in tha thara Israel beih a tum

Hamas hotu Yahya Sinwar a thih hnuah, Hamas thlawptu Lebanon-a Hezbollah helpawl chuan Israel chu tha thar leh nasa zawkin a bei dawn tih an puang zui ve nghal. Iran pawhin Hamas hruaitu thihna chuan Israel do letna kawngah an tha a ti chak dawn a ni tiin a sawi ve bawk.

Hezbollah hian Sinwar thih hnuah Israel an beihna chu nasa zawkin an kalpui nghal a, Lebanon chhim lama an inbeihnaah Israel sipai, Golani Brigade-a sipai panga an thi.