Gaza Strip-ah chhawmdawlna phurtu truck 50 luh tir

US-in Gaza Strip-a indona tuartu, mipuite chhawmdawlna tur tam zawk luh tir tura ni 30 chhung Israel hun a pek hnuah, Israel chuan Nilaini khan Gaza hmar lama chengte tan chhawmdawlna phurtu truck 50 a luh tir.

Gaza Strip-a chhawmdawlna lut leh semdarh a nih dan enpuitu, Israel military-a COGAT chuan Nilaini khan Gaza hmar lamah chhawmdawlna phurtu truck-te hi Jordan aṭangin Allen Crossing kaltlangin luh tir an ni tih a sawi. Heng truck-te hian ei tur, tui, damdawi leh mamawh dangte an phur a ni.

COGAT chuan Israel chuan Gaza-ah chhawmdawlna phurtute awlsam zawka an luh dan tur a buaipui sak zel dawn tih a sawi. Thawhṭanni khan truck 30 chuan Gaza hmar lam hi an lo thleng tawh bawk.

Chhawmdawl hna thawktute chuan kar hnih dawn chu ṭanpuina thawn luh turte chu dan an ni tawh niin an sawi. Hetih lai hain Israel sipaite chuan Gaza hmarlama Hamas te intuaithar tuma hma la mekte chu dan chepa, rilṭama hrek an tum niin an sawi. Hei vang hian beihpui an thlak hmain civil mite sing tel chu hmun danga insawnchhuak turin an hriattir a, mahse mi tam takin an zawm duh lo a ni.

Civil mite tawrhna nasa thleng mekah, chhawmdawlna turte thawn luh kawnga harsatna a awm vangin, US secretary of state Antony Blinken leh defence secretary Llyod Austin-te chuan Pathianni khan Israel defence minister Yoav Galland leh strategic affairs minister Ron Dermber te lehkha an thawn a ni. Lehkhathawnah hian Israel chu ni 30 chhung Gaza hmar lamah chhawmdawlna phurtu motor tam zawk luh phalsak turin an ti a, an ngenna hi zawm a nih loh chuan US-in Israel sipai a puihna ṭhenkhat pawh tih tawp mai theih a nih thuin an vau.