UK-ah Covid-19 hri vanga thi tam ber ni thleng

United Kingdom (UK)-ah Thawhlehni khan Covid-19 hri vanga thi mi 241 an awm a, hei hi June thla hnua UK-a ni khata hripui vanga thi an tam ber ni a ni.  

UK-ah Covid-19 vanga thi hi mi 43,967 an tling tawh a, thi zingah hian Covid-19 an kai aṭanga ni 28 chhunga thi an tam ber bawk. Thawhlehni vek khan UK-ah hri kai thar hi mi 21,331 an awm a, anni nen hian UK-a hri kai hmuh chhuah tawh zawng zawng hi nimin thleng khan mi 7,62,542 an tling tawh.

Public Health England medical director, Yvonne Doyle chuan UK-ah covid vanga thi an tam chhoh thu sawiin, thi zinga a tam zawk hi kum lama upa an nih thu leh natna nei sa an nih thu a sawi. Hei vang hian hri dona kawngah tute pawn mawh an phur tih a sawi a, July thla aṭang khan England leh Wales-ah thi an tam thu a sawi bawk.