Naupang paruk zinga pakhat dinhmun rethei lutukah awm

World Bank Group leh UN Children's Fund (UNICEF) tarlan danin khawvela naupang paruk zinga pakhat (chu chu naupang maktaduai 356) chu extreme poverty (rethei lutuk)-a cheng an ni. Hei hi Covid-19 hri len hma anga chhut a ni a, hri len hnuah phei chuan hei ai  hian an punchhoh rin a ni bawk. 

Sub-Saharan Africa-a cheng naupang hmun thuma ṭhena hmun hnih chu chhungkaw khawsak harsa taka mi an ni a, chawhrualin heng chhungkua hian nikhatah US dollar 1.90 an thawk chhuak pha lo anga chhut a ni. 

Kum 2013-2017 khan khawvel naupang dinhmun rethei lutuka awm zat hi a tlahniam nia chhut a ni a, extreme poverty-a awm naupang hi maktaduai 29-in a tlahniam hman a ni. 

World Bank leh UNICEF chuan Covid-19 leng chuan ram hrang hrang economy a nghawng a, mamawh insem kawngah a rualkhai lo  chho a, hei hian hun lo kal zelah pawh retheihna belhchhahna a thlen belh dawn niin an tarlang.  "Hri leng vang hian kan khawvel chuan sum leh pai lamah harsatna a tawk chho mek a, hei vang hian heng naupang rethei tak takte leh an chhungte chhawmdawl hna thawk tur hian sorkar chuan nasa taka hma a lak a ngai a ni," tiin UNICEF Director of Programmes Sanjay Wijesekera chuan a sawi.

Khawvela mi rethei awm zinga a chanve chu naupang an ni a, naupang rethei zinga 20% chu kum 5 hnuai lam an ni tiin, Poverty and Equity for the World Bank global director, Carolina Sánchez-Páramo chuan a sawi. Hri len hma pawhin khawvela naupang paruka pakhat  chu chhungkaw rethei taka mi an nih avangin ngaihthah chi an ni lo a, hri len hnua economy a chhiat chhoh mek avang hian ngaihsak zual an ngai tih Carolina Sánchez chuan a sawi bawk.

Hengte avang hian World Bank leh UNICEF chuan ram hrang hrang, a bikin ram ṭhang meka naupang rethei zual awmna ramte tan social protection programme uar thar turin leh, chung programme zingah chuan pawisa hmanga inpuih tawnte uar turin ram hrang hrang sorkarte hnenah thurawn a pe.