Nepal lirnghing Chhawmdawl hna thawh danah mipuite an lungawi lo

Lirnghing na tak tuar­tu, Nepal ram mipuite chhanchhuah leh chhawm­dawl hna chu thawh chhunzawm zel ni mah se, hna kalpui danah lirnghing tuartu mipui tam tak an lungawi lo hle. Nimin thleng khan lirnghing vanga thi zat hi mi 6,000 chuang an tling tawh.

Thingtlang khaw tam tak, linghing vanga chhiatna rapthlak tak tuartute chuan lir a nghing aṭanga ni nga-na, nimin thleng khan chhawm­dawlna engmah an la dawng ve lo tih an sawi.

United Nations chuan Nepal ram mipuite ṭan­puina atan hian thla thum chhungin US dollar maktaduai 415 mamawh a ni dawn tih a sawi. UN chuan kar kalta Inrinnia lirnghing kha mi maktaduai 8 chuangin an tuar a, lirnghing hian in 70,000 chuang a tichhia a ti.

Kathmandu hmarchhak lam biala thingtlang khaw eng emaw zatah lirnghing hian chenna inte chu luahzui tlak lohin a tichhe vek a, ruang tam tak chu in chim hnuaiah hian an la awm nia sawi a ni. Thingtlang khaw ṭhenkhat chu kawngpui leh helicopter hmanga kalpawh theih ni tawh mah se, chhawmdawlna a la thleng lo nia sawi a ni bawk.

UN resident co-ordinator for Nepal, Jamie McGoldrick chuan, "Lirnghing tuarte ṭanpui hna thawh dante chu lawmawm hle mah se, hmun kilkhawr zawka cheng, lirnghing tuarte zawng zawngin ṭanpuina an dawn theihna turin chak zawka hma lak a ngai a ni," a ti.

McGoldrick chuan mi 200,000 vel chu chenna in nei loin an awm a, heng mite in sakna tur hmanruate chu thawnluh tawh nia sawi ni mah se tun thlengin an la dawng lo tih a sawi.

Kathmandu khawpuiah chuan chhawmdawlna sem hna tih khawtlai a nih avangin Nilaini khan mipui thinrimte'n riot police-te an tibuai. Tui thianghlim in tur phurtu truck chu mipuite'n kawngsirah din luih tirin, a tui bottle phurhte chu an laksak lui a ni.

Prime Minister Sushil Koirala-a'n Nilainia Kathmandu-a relief camp a tlawh ṭumin mipuite chuan an lungawi loh thu an lo thlen a, PM chuan a theih anga ranga ṭanpuina pek a tiam.

Nimin zing thleng khan Nepal hi lirnghingin a sawi nawn a, aftershock hi vawi 110 a thleng tawhin, nimin zing dar 6.22 vel khan richter scale-a 4.7-a nain aftershock a thleng leh a ni.

Pathianni aṭang khan hmun him lam pana Kathmandu chhuahsan, mi 3,40,000 an awm tawh a, Nilaini ringawt pawh khan mi 66,000 chuangin Kathmandu an chhuahsan.