Netanyahua'n party pahnih inremna a ziahpui
Israel Prime Minister Benjamin Netanyahu chuan ṭangrual sorkar thar siam turin Nilaini khan party pahnih chu inremna a ziahpui. Sorkar thar siam tur hian kar khat hun a la nei.
Netanyahu-a party, Likud Party chuan March 17-a inthlanpui neihah parliament seat 120 awmah seat 30 lain, seat a la hnem ber. Mahse party mala sorkarna a siam phak loh avangin ṭangrual sorkar siampui tur a zawng mek a ni.
Nilaini khan PM Netanyahu hian ultra-Orthodox United Torah Judaism (UTJ) party leh centre-right Kulanu party chu thawh hona tura inremna a ziahpui a, heng party pahnihte nen hian seat 46 an nei.
Kulanu hruaitu Moshe Kahalon chu finance portfolio pek a ni dawn tih Likud party thuchhuah chuan a tarlang. Kulanu hian environmental protection leh construction ministry pawh a chang tel dawn nia sawi a ni bawk.
Ultra-Orthodox news site, Kikar BaShabat chuan inremna an siamah hian an party hruaitu, Yaakov Litzman chu deputy health minister atana dahin, UTJ member Moshe Gajni chu parliamentary finance committee hotu atana dah tum a ni tih a tarlang.