US khawpui hrang hrangah lungawi lohna lantir chhunzawm

United States, Maryland state-a khawpui lian ber, Baltimore-ah Nilaini khan police kuta a awm laia mihang tlangval, Freddie Gray a thih vanga lungawi lohna lantir a ni a, hemi ni vek hian New York, Washington leh Boston khawpuiahte police thuneihna dik lo taka hman duh lohna leh, rorelna dik phutin kawng an zawh bawk.

New York-a kawngzawhte hi Union Square-ah an pungkhawm a, tel an ṭhahnem hle. Baltimore-ah hian City Hall kawtah an pungkhawm bawk.

Khawpui pahniha mipui pung­khawmte chuan Gray-a thih danah rorelna dik taka hlenchhuah an duh thu an sawi a, hei bakah hian police te'n African-American-te an ngaihdan enfiah an phut bawk.

Baltimore khawpuiah hian buaina a chhuah venthawn thilah National Guard sipai 2,000 bakah enforcement officer 1,000 chuang duty tir an ni.

Baltimore khawpuiah hian a hmain lungawi lohna lantira kawngzawhte'n tharum thawhna leh pawikhawihna an thlen avangin emergency puan a ni a, Thawh­lehni zan aṭang khan zan lamah curfew puan a ni bawk.