Hezbollah-in drone-in Netanyahu chenna in bei; Israel-in Beirut chhimlamah beihpui a thlak nghal

Israel prime minister Benjamin Netanyahu chuan Inrinni, October 19, 2024 khan Iran thlawp, Lebanon helpawl Hezbollah chuan thah tumin, Caesarea khuaa a in chu drone hmangin an bei tih a sawi. Mahse hetih lai hian inah hian an awm lo tih a sawi bawk.

Prime Minister Netanyahu chuan he thil thleng chungchangah thuchhuah siamin, "Iran thlawp Hezbollah chuan kei leh ka nupui min thah an tum chu an tihsual liam tak a ni," tiin a sawi. Israel mi tu pawh tihnat tum chuan a man a tel zel dawn a ni tiin, Iran leh Hezbollah chu a vau zui nghal.

Hezbollah chuan Netanyahu chenna in beih chu an hriatpui lo tiin an sawi a, mahse Inrinni zan khan Iran-a United Nations mission chuan Hezbollah thiltih ngei a nih thu a sawi a ni.

Israel sipai thupuangtu, Rear Admiral Hagari chuan drone hian prime minister beih a tum ngei tiin, Ceaserea-a an in chu a fuh niin a sawi. Ceasarea hi Hezbollah hoin an beih fo, Haifa khawpui chhim lam km 20 vela hlaah a awm.

Israel-in Beirut chhim lam vawi hnih a bei

Hezbollah in drone hmanga Israel prime minister, Benjamin Netanuahu chenna in an beih tuk, nimin Pathianni khan Israel chuan Beirut chhim lamah vawi hnih airstrike a nei.

Israel sipaite chuan beihpui an thlak hma hian an beihna tur huam chhunga civil mite chengte chu inthiarchhuak turin a hriattir lawk a ni.

Lebanon national news agency chuan an hmelma Israel thlawhtheihnate chuan Beirut chhim lam dai chu vawi hnih an bei tih sawiin, pakhat hian Haret Hreik-a civil mite chenna building a fuh niin a tarlang. Heti lai hian Israel chuan Hezbollah command centre leh leihnuaia ralthuam an dahna hmunte an kap fuh niin a sawi thung. Lebanon chhim lam an beihnaah Hezbollah hel pathum an kahhlum thu an tarlang bawk a ni.