Ukraine-in Russia beih nan drone 100 kap chhuak

Russia chuan an ram khawthlang lam beihna turin Ukraine in drone 100 chuang a kap chhuak a, mahse heng drone-te hi an lo kap thla niin a sawi. Hetih lai hian Russia-in missile hmanga Ukraine-a Kryvyi Rih khua a beihnaah mi 17 an hliam.

Russia defence ministry chuan Inrinni zan khan Ukraine drone 110 an lo kap thla niin a sawi a, hengte hi Russia-a bial hrang hrang pasarih beihna tura a kah chhuah a ni, a ti. Kursk bial bikah drone 43 an kapthla niin an sawi.

Nizhny Novgorod region-a Dzerzhinsk khaw governor, Gleb Nikitin chuan an khuaa industrial zone beihna tura drone kah chhuah an lo kah thlakna lamah fighter paliin hliam an tawrh phah niin a tarlang.

Ukraine president Volodymyr Zelensky chuan kar liam ta chhung khan Russia chuan Urkaine chu aerial bomb 800 leh drone 500 chuang hmangin a bei niin social media-ah a sawi ve bawk. "Nitinin Russia hian kan khawpui leh kan mite an la bei reng a ni," tiin Ukraine thlawptu ramte hnenah boruak aṭanga beihna lo do letna kawnga pui turin a sawm leh a ni.