Tokyo-in hmeichhe governor a nei

Tokyo chuan Pa≠thian≠ni-a inthlan neihah a vawi khatna atan an governor turin hmeichhia an thlan tling.

Kum 2020-a Olympics Games thleng tur, Tokyoa hmeichhe governor hmasa ber tur hian kum 64 mi, Yuriko Koike-i chu thlan tlin a ni. Koike hi defence minister a lo ni tawh a, Japan hmeichhiate zinga defence minister ni thei hmasa ber a ni bawk.

Tokyo governor hlui, Yoichi Masuzoe chu mipuite chhiah tlingkhawm, a ma mimal thil atana hmangah puh a nih avangin June thla khan a bang a, Musuzoe-a hmaa governor pawh sum lama hmingchhiatna a neih avangin a lo bang tawh bawk.

Governor thlannaah hian rorellai Liberal Democratic Party chuan Koike-i hi an thlawp loh avangin indepednent-in a chuh a, hneh taka thlan tlin a ni ta a ni. Rorel lai candidate atan hian rural governor hlui, Hiroya thlan a ni thung. Anni bakah hian eptu pawl candidate, journalist Shuntaro Masuda-te chu hming langsar deuhte a ni.

Inthlan dawna campaign-naah hian kum 2020 Olympics an thlen tur chungchang chu candidate-ten an sawi uar ber te zingah a tel a, Governor hmasa pahnihte hnuaia an inbuatsaihna a ṭhat tawk loh avangin sawisel pawh an hlawh hle. Stadium pui ber sak pawh tihkhaw≠tlai a ni a, games logo tura thlan pawh midang siamsa entawn nia sawi a nih avangin hnawl a ni bawk.

Yuriko Koike :

July 15, 1952 ah Ahsiya, Hyogo-ah a piang a, a pa hi oil lama sumdawng a ni.

Kum 1972-ah Cairo-a American University-ah Arabic a zir a, 1976-ah Cairo University aṭangin Sociology-ah Bacherlor of Arts a zo.

Kum 21 mi a nihin Egypt-a Japan zirlai pakhat nen an innei a, mahse reilote hnuah an inṭhen leh.

Television-ah news anchor hna a thawk ṭhin a, kum 1992-ah politics a luhchilh.

Kum 2003-ah environment minister a ni a, Prime Minister Shinzo Abe-a kaihhruai sorkarah kum 2007 khan defence minister-ah dah a ni.

Kum 2008 Liberal Democratic Party hruaitu hna dinhmun a chuh a, mahse a tling zo lo.

Kum 2016 Tokyo Governor thlanah independent-a chuhin, hneh taka thlan tlin a ni.