Israel PM-in France sawisel

Israel Prime Minister Benjamin Netanyahu chuan France sorkar chu Israel dodaltu pawl sum hmanga ṭanpuiah puhin a sawisel.

Pathianni-a Israel weekly cabinet meeting neihah, Netanyahu chuan media report ṭhenkhata France sorakrin an rama firfiakte pawikhawihna thleng ṭhin avanga ramdang aṭanga mosque ṭanpuian tur sum pek ṭhin dan an tum tih an tarlan chungchang a sawichhuak. He thil hi enfiah tura alo ngen tawh thu sawiin, an enfiahnaah France leh Europe ram ṭhenkhatten Israel boycott tu leh, Israel ram pawm lotu pawl eng emaw zat hnena sum an lo pek ṭhin thu an hmuchhuak tih a sawi.

Netanyahu chuan chiang zawka chhui tir a tum thu leh, an thil hmuhchhuahte pawh France sorkarah thehluh a tum thu a sawi bawk.

Israel-in Palestinian ram a luah, West Bank-a Juda-te chenna in a sak chu Israel ram chhungah pawh pawl eng emaw zatin an dodal a, hei vang hian Israel sorkar an ram luah dodaltu rights group leh organization eng emaw zat khapna dan pawh a lo siam tawh a ni.

July 12 khan Israel parliament chuan ramdang sorkar emaw pawl emaw lak aṭanga sum dawng ṭhin pawl tan bill sawisel hlawh tak a lo pass tawh a, he dan hnuaiah hian heng pawlte hian annual financial report-ah ramdang
aṭanga ṭanpuina sum dawn dan chu chiang taka tarlang tura tih an ni. He thil hian a bikin ramdang ṭanpuinaa innghat, left-wing leh human rights organizations-te a nghawng zual bik a ni.