Syria-ah Russia helicopter kap thla

Russia sipai helicopter chu Syria ramah kahthlak a ni a, helicopter-a chuang mi pangate an thi vek a ni.

Russia chuan sipai helicopter, Mi-8 hi Syria hmarlam, Idlib province-ah helhoin an kap thla niin a sawi. Helicopter hian Aleppo khaw mipuite tan chhawmdawlna a phurh luh sak a, a kir leh lam chu beih a ni ta niin defence ministry chuan a sawi bawk. Helicopter kapthlatu hi eng helpawl ber nge tih erawh hriatchian a la ni lo.

Idlib province-ah hian Islam firfiak pawl an awm nual a, an zingah hian Jabhat al-Nusra tia hriat ṭhin, Jabhat Fateh al-Sham pawl pawh an tel. Islamic State (IS) firfiak pawl pawhin Russia sipaite lakah indo an lo puang tawh bawk a ni.

Helicopter-ah hian thawktu pathum leh officer pahnih an chuang a ni.

Russia hian kum 2015, September thla tawp lam aṭang khan Syria sorkar thlawpin helho lakah beihpui a thlakpui ṭan a ni. July thla khan IS hoin Palmyra-ah Russia thlawhtheihna hi kap thlain, pilot pahnihte an thi a ni. Nikum November thla khan Russian indo thlawhtheihna, Su-24 chu Turkey leh Syria inri-na bulah Turkey in a lo kahthlak sak tawh bawk a, pilot a thi. Pilot chhanchhuak tura sipai pakhat tirh pawh kahhlum a ni bawk.

Aleppo khuaah hian Syria sipai leh helho an la inbei chhunzawm reng a, Aleppo leh a chhehvelah hian ni 80 chuang an inbei tawh a, hliam tuar leh thi mi 6,000 chuang zet an awm tawh niin Syrian Observatory of Human Rights chuan a sawi. Helho hian khawpui khawchhak lam hial an thunun a, hei hi lak let tumin sorkar sipaite chuan beihpui an thlak mek a ni.

United Nations chuan Aleppo khawchhak lam bialah hian civil mi 200,000 - 300,000 vel an la tangkhang niin a sawi a, indona hlaua khawpui aṭanga tlanchhiate dinhmun pawh a ṭha chuang lo tih a sawi. Hel leh sipaite inbeihna avangin khawpuiin mamawh a chawk luhna kawngpuite chu danchah a ni a, hei vang hian mipuiten ei leh in lam an tlachham ṭan mek a ni. Damdawi lam inenkawlna pawh an indaih lo a, fuel a lakluh theih loh avangin hospital generator-te pawh hman theih lohin an awm thuai dawn nia sawi a ni.

Syria leh Russia sorkar chuan khawpuia chengte mamawh zualpui, ei tur leh damdawite chawk luhna tur leh, khawpui aṭanga chhuak duhte tana hman turin kawng pathum an hawng a, kalchhuahna tur kawng pali-na pawh siam thuai an tum.