US-in Libya-a IS-te a bei

United States chuan Libya sorkar ngen angin an rama Islamic State (IS) firfiakte lakah Thawhṭanni aṭang khan beihpui a thlak.

US sipaite hian thlawhtheihna hmangin Sirte khawpuia IS hmun pawimawhte an bei a ni.

Libya ramah hian IS te hi an pun chak avangin khawthlang ramte pawhin an ngaimawh ṭan hle a, February thla leh nikum November thla khan US sipaite chuan Libya-a IS hmunte hi a lo bei tawh bawk a ni.

Pentagon chuan Thawhṭanni-a beihpui an thlak hi President Barack Obama-a thupeka tih a nih thu leh, IS ho nena inbei mek Libya sorkar sipaite puihna tura tih a nih thu a sawi. Pentagon thupuangtu Peter Cook chuan an tum tak an kahfuh thu sawiin, heng zingah hian firfiak pawl tank pawh a tel tih a sawi.

Libya sorkar chuan kumin May thla aṭang khan Sirte-ah hian IS lakah beihpui a thlak ṭan a, hma pawh a sawn chak hle a ni. Official-te chuan Sirte khawpuia firfiak 6,000 vel awm ṭhin pawh an tlahniam tawh hle niin an sawi. Cook chuan Sirte-ah hian firfiakte hi 1,000 vel bak an awm tawh lo niin a sawi a, lei lama inbeihnaah erawh US sipaite an tel loh thu a sawi.