Indonesia President tharin cabinet member 109 ruat

Indonesia president atana lak luh thar, Prabowo Subianto chuan Pathianni khan a cabinet member-te puangin mi 109 zet minister atan a ruat. President kal chhuak, Joko Widodo kaihhruai sorkarah khan minister leh national agency hotu mi 34 an awm.

Cabinet minister-te hi Cabinet of Ministers, Vice-Ministers leh national agency hotute chu Red and White Cabinet tih tein dah anni.

Kum 73 mi, Subianto hi Pathianni khan Indonesia President pariatna atan lak luh a ni a, a rual hian a vice president atan kum 37 mi, Surakarta lak luh a ni bawk.

President Subianto chuan sorkar chak tak siam a lo tiam tawh a, heti hian sorkar chak siam a tumna atana cabinet minister tam tham tak a ruat chuan sorkar sum senral a ti tam dawn hle niin an ngai. Subianto chuan President atana lak luh a nih hmaa chanchinthar lakhawmtute a kawmnaah, "Sorkar chak tak siam ka duh a, society hrang hrangte inlungrual taka awm a, politics lamah pawh huam zau tak siam ka duh a ni," tiin a lo sawi lang tawh a ni. Cabinet member atana ruatte hi kumin February thlaa inthlanpui an neiha an party thlawptu, party pasarih amite an ni.

Indonesia President thar Subianto hi special forces commander hlui a ni a, kum 1998 khan activist-te rukbo leh nghaisaknaa inrawlhah puh a nih avangin army aṭangin ban a ni. Mahse a thubuai hmachhawn loin himna zawngin Jordan ramah a tlanchhia a, kum 2008-ah Indonesia-ah a kir leh a ni. A kir hnu hian Gerinda party dinin, President thlannaah vawi hnih chu Widodo a hneh zo lo a ni. Mahse kum 2019 khan Widodo-a sawmna pawmin defence minister-ah a awm zui a ni. Kumin February thlaa President thlannaah hian vote 58.6% hmuin a chak ta a ni.