IDF-ten Hamas hotu Sinwar khawsakna Leiverhah pawisa fai tam tak hmu chhuak

Israel Defence Force (IDF) chuan Hamas firfiak pawl hotu an kah hlum tak, Yahya Sinwar bihrukna leiverhah pawisa fai tam tham tak an hmu chhuak tih an sawi. Sinwar hi a khawsa nuamsa hle tih hriat chhuah a ni bawk.

Sinwar thih hnuah IDF chuan Gaza Strip-a Khan Younis khuaa leiverh-a Sinwar khawsakna hmuna thil awmte puangzarin a khum bula chhuarah pawisa fai tam tham tak hmuh a nih bakah, UN food ration, intihfaina hmanrua hrang hrang bakah ralthuamte a awm. Video footage aṭanga a lan danin, IDF ten an beih hma khan Sinwar hi a chhungte nen Rafah-ah leiverh dangah an tlanchhia a, an tlanchhiat laia a nupui bag ken pawh Hermes Birkin handbag, USD 32,000 man zet a ni.

Yahya Sinwar hi October 7, 2023-a Hamas ten Israel an beih ṭuma a bultumtu leh a reltu ber nia sawi a ni a, Khan Youni-a leiverah a awmna aṭangin thu pekte a siam ṭhin. IDF chuan a birukna hmuna hian choka ṭha tak awmin, United Nations Relief and Works Agency for Palestine Refugees (UNRWA) hnen aṭanga ei tur a dawnte a chhek khawl a ni, an ti. Hei hian Gaza mipuite tana chhawmdawlna pek ṭhin, Hamas hoin an lo pawtpeng ṭhin nia puhna awm ṭhin pawh a rawn chawk tho thar leh a ni. Ei tur inchhek khawl bakah, bathroom eng emaw zat leh shower thlengin a bunker-ah hian a awm a, Sinwar hi a mimala hman tur shower pawh a nei bawk a ni. Heng bakah hian ralthuam, silai leh a mu bakah puakthei thil eng emaw zat hmuh a ni bawk.

Rafah leiverh lamah an tlanchhiat hnuah IDF hian Sinwar hi intelligence leh DNA sample aṭangin anchhui zui a, leiverh pakhatah a DNA hi tissue pakhatah an chhar a, heta ṭang hian a birukna hmun hi a chhui chhuak thei ta a ni. October 16, 2024 khan Bislamach Brigade-a Israel sipaiten Sinwar hi an kap hlum a, mahse puang zar mai loin an finfiah hnuah a thih thu hi a puang ta chauh a ni.