Hezbollah in Beirut hospital hnuaiah pawisa tam tham tak leh rangkachak an thukru - Israel
Israel sipaite chuan Lebanon helpawl, Hezbollah chuan Beirut khawpuia Al-Sahel hospital hnuaia bunker an siamah pawisa tam tham tak leh rangkachak an thukru niin an sawi. An thil hmuh chhuah hi USD mtd 500 hu zet a ni tih an sawi.
He thu hi Israel sipai thupuangtu, rear admiral Daniel Hagari chuan sawiin, Isarel intelligence ten kum eng emaw chen an chhui aṭanga an hriat a nih thu a sawi. Hospital hnuaia bunker hi Israel sipaiten an thah tak, Hezbollah hruaitu hlui Sayyed Hassan Nasrallah siam a nih thu sawiin, hun rei tak a khawsak theihna tur atana a lo duan a ni, a ti. Hagari hian he bunker thlalak leh video te pawh a ti lang a, mahse Israel chuan Hospital hnuaia bunker siam hi beih a tum lo niin a tarlang.
Hagari chuan Lebanon official-te chu he hmun enfiah tur leh, Hezbollah laka action la turin a phut a, "Lebanon sorkar, thuneitute leh international organisation te hnenah, heng sumte hi Hezbollah te firfiaka chetna leh, Israel beihna tura an hman remti lo turin ka ngen a ni," a ti.
Israel Defence Force (IDF) hian Hezbollah bakah Palestinian firfiak pawl, Hamas te chu hospital, school leh hmun pawimawh dangte an ralthuam thuhrukna atan leh bihrukna atana hmang ṭhinah a lo puh fo tawh a ni.
Lebanon mipui leh Iran sorkar chu Hezbollah ten sum an hmuhna pui ber pahnih an ni tiin, Hagari chuan Iran aṭang hian Syria kaltlangin Lebanon-ah rangkachak leh sum hi an thawn ṭhin niin a sawi. Lebanon, Syria, Yemen leh Turkey-a Hezbollah hian factory neiin, hengte hi an pawl sum lak luhna pakhat atan an hmang bawk a ni, a ti.
Beirut hospital hnuaia bunker an hmuh chhuah chu building dang pahnih nen inpawhin, hei hi luhna leh chhuahna atana an hman thu Hagari chuan a sawi. Lebanon mipuite hnenah helpawlin hospital hnuai chu sum an chhekna hmun atana hman phalsak lo tura ngenin, Israel chuan civil mite a bei lo a, Iran thlawp helpawlte a bei a ni, a ti. Hemi rual hian heng helte hian Israel an beihnaah Lebanon civil mite ch inphenna atan an hmang ṭhin niin a sawi bawk.