NKorea hotuin Russia sawmna a hnar
North Korea ram hotu, Kim Jong-un chuan Russia-in Indopui II-naa Soviet Union hnehna chan hriatrengna hun, Moscow-a hman turahtel tura a sawmna chu, special treatment pe tura a phûtna Russia-in a hnawl avangin a hnar.
Russia parliament, Kremlin thupuangtu chuan Kim hian inhriatthiam lohna awm vang hian Moscow-ah kal loin, Pyonyang-a awm a thlang zawk a ni, a ti.
NKorea hruaitu hian Russia President Vladimir Putin-a hnenah Moscow a kal chuan special treatment pe turin a phût a, mahse he hunah hian ramdang hruaitu tel tur an tam dawn avangin a bik taka ngaihsak a phutna hi an pe thei dawn lo a ni.
Ramdang hruaitute nena ang khat veka dawnsawn chu duh loin, Kim hian Russia sawmna hi a hnar ta niin South Korea chanchinbu, Chosun Ilbo chuan a tarlang.
Hetihlai hian The Centre for North Korea-US Peace executive director, Kim Myong-chol chuan report hi a dik lo tih sawiin, North Korea sorkar chuan Moscow-ah Kim kal a tum thu hi a la sawilang lo hrim hrim tiin, a kal dawn nia sawi pawh hi Russia duhthusam mai a ni, a ti.
NKorea ram hruaitu hian kumin September thlaa China-a indopui tawpna hriatrengna hun hman turah kal a tum nia sawi a ni a, mahse Kim Myong-chol chuan China ram a tlawh dawn chuan August thlaa NKorea din champha vawi 70-na an hman turah China President Xi Jinping chu a tel ve phawt an phut tih a sawi.