Lirnghingin a tihchhiatte din thar nan dollar tld 2 mamawh
April 25-a Nepal rama lirnghing vanga thi zat chu nimin zing thleng khan mi 6,204 an tling tawh a, hliam tuar mi 13,906 an awm bawk. Lirnghingin a sâwi nawn (aftershock) pawh a la awm chhunzawm reng a ni.
Lirnghing vanga thi ruang tam tak chu hlawm mumal lohin an an la awm a, thuneitute chuan mitthi ruang tihral chu hna hautak tak a ni dawn tih an sawi. Ruang dahna hmunte a khat vek tawh a, chhanchhuah hna thawktute hnenah ruang an hmuh tharte pawh hal ral nghal zel tura hriattir an ni.
Information Minister Minendra Rijal chuan sorkarin lirnghing vanga thi chhungte hnenah dollar 1,000 a pe nghal dawn a, hei bakah hian mitthi ruang phum emaw, halralna emaw senso atan dollar 400 pek an ni dawn bawk tih a sawi.
Finance Minister Ram Sharan Mahat chuan lirnghingin in leh thil dang a tihchhiatte din thar lehna atan dollar tluklehdingawn 2 tal mamawh a ni dawn tih a sawi. Lirnghing hian chenna-in 600,000 chuang leh, hospital, sorkar office leh historic building tam tak a tichhia a ni.
Hmun kilkhawr zawk leh tlangdunga thingtlang khuaah pawh chhawmdawlna thawn luh ṭan a ni a, hetihlai hian sorkar chu chhawmdawlna an dawnte semchhuah kawnga che muang lutukah puhin mi tam takin an sawisel mek bawk.
Red Cross chuan an team-te'n lirnghing inṭanna, epicentre bula khuate an lut tawh tih sawiin, heng hmuna lirnghingin chhiatna a thlen dan chu a rapthlak hle tih a sawi a, khaw ṭhenkhatah chuan chenna-in 70%-80% vel a chhia niin an sawi. Hmun kilkhawr zawka chengte tan helicopter 20 hmangin lirnghing tuarte ei tur leh mamaawh dangte thlak mek a ni a, hetihlai hian Nepal sorkar chuan helicopter-te hi an indaih lo hle tih sawiin, ramdang puihna a ngen.