Malala-i kaptute kum 25 tang turin hrem

Kum 2012, October thlaa Pakistan tleirawl, Malala Yousaf­zai-i kah a nihnaa inhnam­hnawiha puh, Pakistan Taliban firfiak pawla mi 10-te chu kum 25 tang tura hrem an ni tih Pakistan chanchinbu, Dawn chuan a tarlang.

Hmeichhe naupangte'n zirna an neih theihna tura beitu, Malala Yousafzai-i hi kum 2012 khan Pakistan-a Swat Valley-ah school bus-a a chuang lai chu firfiakte hian beiin an kap a, a luah hliam na tak a tuar a ni. Hetihlai hian Malala-i hi kum 14 mi chauh a ni. Britain-ah hruaiin, Birmingham hospital-ah enkawl a ni a, thla thum chhung enkawl a nih hnuin ṭha takin hospital aṭangin an chhuak.

A hliam a dam hnuah pawh Britain-ah a la awm chhunzawm a, hmeichhe naupangte'n lehkha zirna an dawn theihna turin a campaign chhunzawm zel a, a hnathawh avangin chawimawina hrang hrang pawh pek a ni tawh. Khawvela chawimawina ngaihhlut ber, Nobel Peace Prize pawh hlan a ni tawh bawk.

Pakistan sipaite chuan kum 2014 khan pawikhawihtute hi Swat Valley-a beihpui thlaknaah man an ni tih a sawi a, Khyber Pakhtunkhwa province-a Swat District anti-terrorism court chuan kum 25 tang turin a hrem ta a ni. Hetihlai hian pawikhawihna thlenga a hotu ber nia puh, Ataullah Khan erawh chu thiam loh chantir zingah a tel lo.

Malala Yousafzai-in hmei­chhe naupangte'n zirna an dawn theihna tana a beihna avanga chawimawina a dawn tawhte-

Nobel Peace Prize

Time Magazine-a '100 Most Influential People' list-ah a tel

University of King's College-in Honorary Doctorate a pe

EU-in Sakharov Prize a hlan

Pakistan National Youth Peace Prize

World Children Prize dawng tura nominate a ni

Pakistan-in civil mi huaisen chawimawina a siam, Sitara-e-Shujaat hlan a ni.