Nepal: Emergency supply a indaih tawk lo

Nepal ram lirnghing vanga in chim hnuaia tangte zawn hna chu thawh chhunzawm zel ni mah se, nungdama hmuh beiseina a tlem tawh hle. Hetihlai hian lirnghing tuarte ṭanpuina tura emergency supply chu an indaih lo hle niin thuneitute chuan an sawi.

Magnitude 7.9-a naa lirnghinga thi hi mi 7,000 an tling tawh a, hliam tuar mi 14,000 chuang an awm bawk. Lirnghing hian Nepal ram hmun hrang hrangah in 600,000 chuang a sâwi chhia a, hmanlai in hlui leh hmun pawi­mawh dang eng emaw zat a chhe tel bawk.

Ningani aṭang khan in chim hnuai aṭanga nungdama chhanchhuah report a awm tawh lo a, mitthi ruang chauh hmuh an ni tawh. Nungdama chhanchhuah beiseina a tlem tak avangin lirnghing tuarte chhawmdawlna pek lam thlur bing ṭan a ni.

Lirnghing vanga chenna nei lo mi tam tak an awm avangin heng mite awm lailawkna tura puan in ngai zet hi 600,000 vel nia chhut a ni a, mahse thuneitute chuan puan in hi 50,000 chauh an la semchhuak.

Hmun tamtakah chuan ei tur leh tui thianghlim in tur an mamawh a, hengahte hian helicopter-in an mamawhte thlaksak ni mah se, an indaih lo hle. Chhawmdawlna hian lirnghinna bial chhunga district headquarters-te deuh chauh a la thleng thei a, leimin vanga tlawhpawh theih loh, thingtlang hmun kilkhawr zawkah thlawh­theihna hmangin an mamawhte thlaksak an ni dawn tih Home Ministry thupuangtu Laxmi Prasad Dhakal chuan a sawi.

UN humanitarian chief, Valerie Amos chuan Nepal thuneitute'n lirnghing tuarte chhawmdawlna semchhuah tur an tifel muang lutuk chu pawi a tih thu a sawi a, ramdang aṭangin ṭanpuina tam tak a lut reng a, hengte lo tihfel hna hi a chak tawk lo nia a ngaih thu a sawi. Amos chuan Nepal Prime Minister Sushil Koirala biain, chhawmdawlna bungrua lutte lo tihfel hna chu chak zawka kalpui tura a duh thu a hrilh tawh bawk.

Ram hrang hrang aṭangin chhawm­dawlna hi thawnluh ni mah se, tam tak chu enfiah turin Kathmandu-a interna­tional airport-ah an la tang a, custom official-te chuan India aṭanga truck hmanga chhawmdawlna pekte pawh an lo dang bawk. Kathmandu-a Tribhuvan International Airport manager chuan an rama lirnghing na tak avang leh, aftershock a la thlen chhunzawm reng avangin thlawhtheihna liante chu an ṭum an remti rih lo niin a sawi.