IS-te'n Yazidi mi 300 an that
Islamic State (IS) firfiakte chuan Yazidi hnam an man zinga mi 300 te chu Iraq hmarlam, Mosul khuaah an that.
Yazidi Progress Party chuan thuchhuah siamin, firfiakte hian Yazidi mi 300-te chu kar kalta Zirtawpni khan Mosul bula Tal Afar district-ah an that niin a sawi a, tihhlum an nih dan erawh a tarlang lo.
Iraq Vice President Osam al-Nujaifi chuan firfiakte'n an mi mante an tihlum chu nunrawnthlak a tih thu a sawi.
IS-te hian nikum khan Nineveh province-a Yazidi hnam chenna, Sinjar district hi beiin an la a, Yazidi hnam mi sang chuang an man.
Kumin January thla khan IS hian Yazidi mi an man zinga 200 te chu chhuahin, Kurdish official-te kutah an hlan. An mi chhuahte hi kum upa zawk leh damlote an ni.