Yemen vangin Russia-in UN urgent meeting a ko

Yemen tualchhung indona thleng mek avangin Russia chuan UN urgent meeting a ko a, mahse member ram 15-te chuan hma lak dan turah thutlukna siam thei loin, meeting hi an titawp.

UN meeting hi Russia ambassador, Vitaly Churkin-a koh a ni a, member-te chuan Yemen-a tualchhung indona thleng mekah a ram mipuite puih an ṭul zia an sawi rual a, hma lak dan tura thutlukna an siam thei lo chu mak a tih thu a sawi.

Russia hian tualchhung indona avanga Yemen mipuite tawrhna leh security dinhmun-te sawi ho a, puih an nih theih dan turte rel a duh a ni. Mahse Churkin chuan a rawtna siamte chu UN security council member dangte chuan an thlawp theih lo a ni, a ti. Russia hian Yemen rama inbei mek, Houthi helpawl leh sorkar sipaite inkarah inkahhai puan tir a rawt a, hei hi an thei lo a nih pawhin mipuite ṭanpui an nih theihna tura hun eng emaw chen an inbeih chawlh lailawk tir a rawt a ni.

UN Secretary General Ban Ki-moon-a office chuan Yemen tualchhung indona vang hian mi 1,200 chuang an thi tawh niin a sawi. Yemen sipaite puiin, Saudi Araba kaihhruai Arab ṭangrual ramte chuan thlawhtheihna hmangin beihpui an thlak reng bawk.