Canada Prime Minister-in Iraq a tlawh

Canada Prime Minister Stephen Harper chuan puang lawk loin kar kalta Inrinni khan Iraq a tlawh a, Iraq sorkarin Islamic State (IS) firfiakte a beihnaah theihtawpa puih zel a tiam.

Canada sorkar chuan IS firfiakte avanga Middle east biala raltlante ṭanpuina atan dollar maktaduai 139 a pek tur thu a sawi a, hei bakah hian Iraq puihna turin dollar maktaduai 67 pek a lo tiam tawh bawk. Canada hi Iraq sipaite pui tura US kaihhruai ṭangrual pawl hmalaknaah pawh a tel a, anni hian IS firfiakte hmun pawimawh thlawhtheihna hmanga an beih bakah, Iraq sipaite training an pe bawk a ni.

Harper chuan, "IS-in Canada mite vau a, Iraq rama pawisawilo civil mite chunga rawng taka a chet lai hian Canada chuan kut kuangkuahin a en mai mai dawn lo," a ti.

Iraq Prime Minister Haider al-Abadi chuan Harper hi lo dawng­sawngin, ṭangrual ram zinga Canada a tel chu lawmawm a tih thu a sawi. Iraq PM chuan firfiakte hian Iraq ram dinhmun chauh a tiderthawng lo a, a chhehvel bial leh khawvel ram pum himna tichhe thei an ni tiin, bei let tura khawvel ram hrang hrangte lungrual taka an thawhho a ngaih thu a sawi.