Maldive President hlui chhuah phuta nawrh huaihawttute an man

Maldive sorkarin an ram President hlui, Mohamed Nasheed jail-a a tantir mek chu chhuah phutin eptu pawlte'n nawrh an huaihawt a, eptu pawl hruaitu pathum leh midang 200 vel man an ni.

Kar kalta Zirtawpni khan eptute hian sorkar thutlukna siam danah lungawi lohna lantirin nawrh an huaihawt a ni. Eptu hruaitu man zingah hian Islamic conservative Adhaalth or Justice Party hruaitu Sheik Imran, Maldivian Democratic Party chairman Ali Waheed, Republican Party deputy leader Ameen Ibrahim-te an tel.

Police-te chuan nawrh huaihawtte hi hnawtdarh an tum a, an kaldarh duh loh avangin tear gas-a phuhin, pungkhawm zinga mi 192-te chu an man bawk. An man hnuah police-te hian nawrh huaihawtte chuan warning engmah pe loin thil tihchhiat leh midangte nawr an tum tih a sawi. Hetihlai hian Nasheed-a party, Maldivian Democratic Party chuan police officer-te chuan engmah innawr buaina pawh awm loin mipui pung­khawmte chu an bei niin a sawi thung.

Mohamed Nasheed hi President a nih laia an ram senior judge manna tur thupek a tihchhuah avangin March thla khan thiam loh chantirin, kum 13 tang tura tih a ni. President hluiin manna tur thupek a tihchhuah hi inrukbona nena angkhata ngaih anih thu sawiin, court chuan terrorism law hnuaiah thiam loh a chantir a ni. Hetihlai hian amah thlawptute chuan President Yameen Abdul Gayoom-a'n Nasheed hi politics lama a dinhmun tiderthawng theiah a ngaih avangin a tantir niin an puh.