Hamas-in hruaitu thar ruat dawn lo; Israel-in Hezbollah hruaitu thar tur kaphlum

Palestinian firfiak pawl, Hamas chuan Israel sipaiten kar liam taa an kahlum, an pawl hotu Yahya Sinwar thlaktu tur mimal ruat an tum lo a, committee kaihhruaina hnuaiah an awm tawh zawk dawn niin an sawi.

Israel sipaiten July-a Iran khawpui, Tehran-a Hamas hotu Ismail Haniyeh an thah hnuah, August thla khan Hamas hian member panga awmna committee an din a, hei hi Haniyeh thlaktu, Sinwar-a Gaza-a biru chu biakpawh a har ṭhin avanga an pawl hmalakna kawnga thutlukna siam ṭhin tura an tih a ni. Sinwar thah a nih ve leh tak avangin, Hamas hotu thar hi ruat tawh rih lo a, committee rorelna hnuaiah awm hi an tum ta zawk a, committee member-te hi Qatar khawpui, Doha-ah an awm vek a ni. Committee member-ah hian Gaza aiawhin Khailil al-Hayya, West Bank aiawhin Zaher Jabarin, ram danga Palestinian awmte aiawhin Khaled Meshaal leh Hamas Shura advisory council hotu, Mohammed Darwish te an awm a, secretary erawh a hming an puangzar tel duh lo.

Yahya Sinwar hi kum 2017 aṭang khan Gaza-a Hamas hotu niin, July thlaa Haniyeh thah a nih hnuah an pawl pumpui hotu atan ruat a ni. Mahse kar liam ta Nilaini khan Israel sipaite chuan Gaza chhim lamah an kap hlum a ni.

Nasrallah thlaktu tur kap hlum

Israel sipaite chuan Hezbollah hotu an kah hlum tak, Hassan Nasrallah thlaktu tur Hashem Safieddine chu Lebanon khawpui, Beirut chhim lama airstrike an neihnaah an kap hlum tih Thawhlehni, October 22, 2024 khan an sawi.

Hezbollah pawl hotu lu ber, Nasrallah hi September 27 khan Israel sipaiten Beirut-a beihpui an thlaknaah an lo kaphlum tawh a ni. Safieddine hi Hezbollah pawlah mi pawimawh tak niin, Nasrallah thlaktu tura beisei a ni a, mahse an hruaitu thar atana ruat a nih thu hi an la puang chiang lo thung.

Israel Defence Force (IDF) chuan October thla tir lama Beirut chhim lama Hezbollah hmunhmate an beihnaah Safieddine hi a thi a, an pawl hruaitu dang 25 pawh an thi tel niin an sawi. Hezbollah lam chuan Safieddine chungchangah thuchhuah engmah an la nei lo thung.