New Zealand airport-a inthlah turte minute 3 chiah inkuah thei

New Zealand-a Dunedin Airport-ah chuan thlawhtheihna zin turte leh anmahni thlahtuten inthlahna hun an hman theih zat bituk sak niin, minute thum chiah an inkuah phalsak a ni.

Airport-ah lungchhe taka inthlah a, in kalsan mai thei lote hi hmuh tur an awm fo ṭhin. Mahse inthlah turte inkuah leh hun hman rei avanga traffic jam leh, midang tana harsatna thleng pawh a awm fo ṭhin a, hemi pumpelhna atan hian Dunedin Airport chuan inthlahna hun hman nan hian minute thum chin a bituk sak.

Terminal pawnah hriattirna hi tarlangin, inkuah turte tan pawh a rei berah minute thum hun pek an ni tiin, lungrun taka inthlah duhtute chu airport parking lot lamah kal zawk turin an ti bawk.

Inkuah theih hun an bithlaih hi September thla aṭang khan kalpui niin, hei hi airport-a passenger drop-off area-ah felfai taka thil kalpui a nih theihna tura tih a nih thu airport CEO Dan De Bono chuan a sawi. "He kaihhruaina siam chungchangah ṭhenkhat chuan human rights ngai pawimawh loah min puhin, inkuah theih chin siam thei kan ni lo te min ti a ni. Ṭhenkhat erawh chuan ṭha an rawn ti hle thung," a ti. An kaihhruaina siam chu drop-area ah midangte harsatna an thlen tur venna leh, driver te pawhin sum an chawi phah lohna tur a ni, tiin a sawi.