Israel-ah Ethiopian Jew-te'n lungawi lohna an lantir
Israel-a Ethiopian Jew-te chuan Israel police-te'n vun rawng vangin an enhrang nia sawiin, lungawi lohna lantirin Pathianni khan Tel Aviv-ah kawng an zawh.
Tel Aviv-a kawngzawhte leh police-te hi an innawrbuai a, riot police-te chuan Ethiopian Jew sang tel pungkhawmte hnawhdarhna atan hian stun grenage leh water cannon te an hmang.
Kar kalta khan Israel police-te'n mihang sipai pakhat kut an thlak lai video chu a darh a, he thil thleng vang hian Ethiopian Jew-te chuan police-te chetdan rawng tak leh, vun rawng vanga enhran an nih ṭhin duh lohna lantirin kawng hi an zawh a ni. Mihang sipai kutthlak tua puh police pahnih chu suspend an ni tawh.
Kawngzawhte hian police car an nam thluk bakah, Rabin Square-ah police officer-te chu lung leh bur ruakin an tawng bawk.
Israel Red Cross chuan nawrh huaihawtnaa innawrnaah hian mi 40 velin hliam an tuar a, an zingah hian police officer 23 an tel tih a sawi. Mahse hliam tuar zingah ngaihtuahawm an awm lo nia sawi a ni. Prime Minister Benjamin Netanyahu chuan Ethiopia hnam hruaitute leh, police-te kut tuartu sipai chu hmuh a tum thu a sawi.
Israel ram mipui, maktaduai 8 chuang zingah hian Ethiopian Jew hi 135,500 vel an awm a, an zinga tam tak chu Israel rama piang an ni. Israel rama Ethiopian awmte hian en hran an nih thu an lo sawi fo tawh a, an zinga a zahve aia tam hi rethei tak tak, zirna pawh chhunzawm ṭha thei lo a ni a, high school graduate pawh an tlem hle.