Muhammad cartoon contest neihna hmun beih a ni

US, Texas state, Garland-a zawlnei Muhammad-a cartoon contest neihna chu silai keng mi pahnihin Pathianni zan khan an bei a, security guard pakhat ke-ah an kap fuh. Garland Police-te'n pawikhawihtute hi bei letin an kaphlum a ni.

Garland khawpui-a Curtis Culwell Centre-ah “Muhammad Art Exhibit and Cartoon Contest" neih a ni a, hetah hian American Freedom Defence Initiative chuan Prophet Muhammad-a cartoon ziak thiam ber tan lawmman, dollar 10,000 a siam a ni. He intihsiakna hi mitinte'n an ngaihdan lantir tura zalenna an nei tih lantirna atana buatsaih a ni.

American Freedom Defence Initiative hruaitu, Palma Genner chuan cartoon contest neihna hmun beih a ni chu a dem thu sawiin, "Hei hi zalenna tihtawp sak tuma indona a ni. Engtinge kan tih dawn? Heng misualte kutah hian kan tlawm mai dawn em ni?" a ti.

Contest neihna hmun beih anih lai hian conference centre-ah mi 200 vel an awm a, beih a nih hnu hian heng mite hi school bus hmangin hmun danah thiarchhuah an ni.

January thla khan France chanchinbu, Charlie Hedbo office chu Muhammad-a cartoon a tihchhuah vang hian beih a lo ni tawh a, mi 12 thiin an zinga mi 8 chu journalist an ni.