Nepal lirnghing vanga thi 7,240 an tling tawh Ramdang mi chhanchhuah hna thawktute haw turin ngen

April 25-a Nepal ram lir­nghinga thi chu mi 7,240 an tling tawh a, hliam tuar mi 14,122 an awm bawk niin Ministry of Home Affairs chuan a tarlang.

Lir a nghin aṭanga kar khat liam hnu, Pathianni khan in chim kar aṭangin mi pali chu nungdama chhanchhuah an ni a, an zingah hian pitar kum 105 mi a tel.

Nepal sorkar chuan nimin khan an khawpuia chhanchhuah hna thawk tura kal, ramdang mite chu an ram lama kir tawh turin a ngen. Information Minister Minendra Rijal chuan Kathmandu khawpui chhungah chhanchhuah hna thawh ngai zualte chu thawhfel a ni tawh a, tihtur la awmte chu tualchhung mite'n an thawk chhunzawm thei tawh dawn niin a sawi. Hetihlai hian thing­tlang kilkhawr zawk leh, tlangram lama chengte chhawmdawl hna thawh turah chuan tih tur tam tak a la awm a, heng hmunah hian ramdang mi volunteer-te chu tualchhunga police leh sipaite nen an thawkho thei ang, a ti.

April 25-a lirnghingin a sâwi hnu khan Nepal ram ṭanpui a, chhan­chhuah hna thawk turin ram 34 aṭangin rescue worker 4,050 an lut tawh a ni.

Nepal sorkar chuan tun season atan Everest tlang chu tlang lawnte mite tan an khar rih dawn tih a sawi bawk. Lirnghing vanga vur tawlhin tlang lawnna kawng a tihchhiatte chu siamṭhat mai theih a nih loh thu a sawi. Tlang lawn mite hruaitu, Sherpa special team chuan lirnghing leh a hnua a sâwi nawn khan Everest kawng tam tak a tichhia a, hengte hi tun season-ah siam hman a ni dawn lo tih a sawi. Lirnghing vanga vur tawlh khan tlang lawn mi 18 a chhilh hlum a ni.

Pathianni khan central Nepal-a Nuwakot district-ah magnitude 4.9-a nain lir hi a nghing leh a, mahse thil tihchhiat thar a nei lo nia hriat a ni.

World Health Organizaton leh Nepal Ministry of Health chuan lir­nghing vang hian Ramechhap, Nuwakot, Sindupalchok leh Rasuwa district hospital-te chu hman theih lohin an awm niin an sawi. United Nations Nepal office chuan lirnghing natna bial chhunga health facilities 90% chu a chhe tel niin a tarlang bawk.

Department of Archaeology (DoA) chuan lirnghing hian monument 200 chuang a tichhia tih a sawi. Kathmandu khawthlang lam tlang chhipa awm, khawvela Buddhist shrine upa ber, Swayambhunath Stupa hmun ṭhenkhat pawh a chhe tel, he shrine hi kum 2,000 vela upa nia sawi a ni. Hei bakah hian Buddisht monastery dang eng emaw zat a chhe tel a ni.