'Khawvelin Israel theihna a hmu dawn' - Yoav Gallant

Israel defence minister Yoav Galland chuan October 1-a Iran-in missile tam tham tak hmanga Israel a beihna an chhan let hunah, khawvelin Israel theihna a hmu dawn a ni, a ti.

Minister in he thu a sawina video hi Nilaini khan a office chuan a ti chhuak a, Hatzerim Air Base a tlawh ṭuma Air Force sipaite hmaa a sawi niin a tarlang. "Iran kan beih let hunah, Israel in eng ang theihna nge a nei tih chu an hrethiam ang. Kan hmelma, Israel ram tih nat leh tih chhiat tumte chuan a man sang tak an pe zel dawn a ni," tiin a sawi.

Israel chuan Iran-in a beihna hi a chhang let ngei dawn tih sawi mah se, tun thlengin a la chhang lo. Mahse tun hnaiah Iran beih let a tumdam tarlanna document pahnih chu US lam aṭangin a putru a, hei hian sawi zui pawh a hlawh hle. Federal Bureau of Investigation (FBI) chuan he document putruk chungchang hi Department of Defence leh Intelligence Community nen an chhui chiang dawn tih pawh a lo sawi tawh bawk. Heng document hi kar liamta Zirtawpni khan Telegram channel lamah a darh a, US intelligence community aṭanga rawn put chhuak nia sawi a ni.

Ram hrang hrang chuan Israel hian Iran beihna hi a chhan let ngei an ring a, US chuan Israel-in a ram chhan tura hma a la a nih pawhin a hriatthiampui tur thu a sawi rualin, Iran oil industry infrastructure leh nuclear facility te erawh bei lo turin a ngen thung.