NKorea-in Russia-ah sipai 3,000 a tir

US chuan North Korea-in Russia-ah traning nei turin sipai 3,000 a tir tih sawiin, heng sipaite hi Russia-in Ukraine a do meknaah tirh ve an nih mai theih thu pawh a sawi bawk.

North Korea sipaite hi hmun hrang hrangah training neih tir an nih thu sawiin, October thla tir lam khan lawngin Russia rama lawngchawlh hmun, Vladivostok-ah hruai thlen a ni tih White House national security thupuangtu, John Kirby chuan a sawi a ni.

Kirby chuan, "Heng sipaite hi Russia khawchhak lama military training centre hrang hrangah kalin, tunah hian training an nei mek a ni," a ti a, Ukraine beihnaah Russia sipaite an pui dawn em tih chu an hrechiang lo na a, thil thleng thei a nih thu a tarlang. An awmdan hi an thlithlai zui reng dawn niin a sawi.

Russia leh North Korea hian kum hnih liam ta aṭangin an thawhdunna hi an ti nghet chho hle a, kumin June thla pawh khan beih an tawh palh thut pawha sipaite inpuihtawnna turin defence deal pawh an lo ziak tawh bawk.

South Korea pawhin North Korea chanchin hi a ngaihven ve reng bawk a, Russia hian NKorea nuclear leh missile programme tihchangtlunna tura a puih mai a hlauhthawn thu pawh a sawi a ni. Russia-a NKorea sipaite training pek mek chhan letna atan hian Ukraine tana ralthuam pek chungchang pawh an ngaihtuah dawn niin an tarlang.