Canada MP-ten PM bang turin an nawr

Canada prime minister Justin Trudeau chu Parliament-a a party, Liberal Party member ṭhenkhatin bang turin an nawr mek.

MP 24-te chu PM Trudeau rorel danah leh, tun hnaiah by-election neiha an party chet ṭhat tawk loh vanga lungawi loin, October 28 hma ngeia Prime Minister hi bang tura phutin, lehkhaah an hming an ziak bawk a ni.

Nilaini khan PM Trudeau hoin Liberal Party MP te chuan meeting an nei a, he hunah hian MP lungawi lote chuan Trudeau chu nakkum inthlanpui an neih hma ngeia PM a nihna aṭanga bang tura an duh thu an sawi. MP-te hian minute hnih ṭheuh thu an sawi a ni. Mahse PM bang tura an duh thu sawitu zingah hian cabinet minister-te erawh an tel lo a, MP ṭhenkhat chuan PM chu a tawp thlenga an thlawp tlat tur thu an sawi ve bawk.

Meeting zawhah chanchinthar lakhawmtute a kawmnaah, Trudeau chuan nakkum inthlanpui neih hma chuan Liberal party a kaihhruai zel tur thu a sawi thung. Inthlanpui hi nakkum October thla vela an neih rin a ni. Inthlanpui neih thlenga PM dinhmun hi a chelh zel a nih chuan an party-in an chet chhiatpui ringtu tam tak an awm a ni.

Trudeau kaihhruaina hnuaia Liberal party larna hi a tlahniam hle a, Canada mipui ngaihdan lak hnuhnung berah inthlanpui neiha chak tura an duh ber chu Conservatives ni tawhin, 39% in an thlang. Liberal duhtu hi 23% niin, New Democrats duhtu 21% an awm ve bawk.