Khawvelah Covid-19 kai mtd 67 chuang tawh
John Hopkins University-a Center for Systems Science and Engineering (CSSE)-in a tarlan danin, Pathianni thleng khan khawvel pumah Covid-19 kai mi maktaduai 67 chuang an awm tawh.
CSSE data chuan hri kai hmuh chhuah tawh hi 6,70,27,780 awmin, an zinga 15,35,492 in an thihpui tawh niin a tarlang.
US chu hri kai tamna leh thihpui tamna ber ram a ni chhunzawm zel. US-ah hian hri kai hi 1,47,54,719 awm tawhin, mi 2,82,254 in an thihpui tawh a ni. US dawtah India leh Brazil chu hri kai tam zualna ram an ni bawk.
Covid-19 kai maktaduai khat chuang hmuh chhuah tawhna ramte chu Russia, France, Italy, Britain, Spain, Argentina, Colombia, Germany leh Mexico-te an ni. Hripui vanga mi 50,000 chuang thi an awmna ram zingah hian US bakah India, France, Italy, Britain, Mexico leh Iran te an tel bawk.
Myanmar-ah hripui vanga thi 2,000 an chuang tawh
Myanmar ramah chuan Pathianni khan hri kai hmuh chhuah thar mi 1,108 awmin, hemi ni vek hian hripui vangin mi 29 an thih belh leh bawk.
Ministry of health and sports chuan an ram pumah hri kai hmuh tawh mi 99,155 awmin, heng zinga mi 2,110 chuan an thihpui tih a tarlang. Hri kai zinga 77,636 chu enkawl dam an ni tawh bawk.
Myanmar ramah hian March 23 khan Covid-19 kai hmasa ber hmuh chhuah a ni. Pathianni thleng khan sample 12,88,365 endik a ni tawh a ni.
Indonesia-in China aṭangin Covid vaccine dawng
Indonesia president Joko Widodo chuan Pathianni khan China aṭangin Covid-19 vaccine an dawng a, mipuite hnena semchhuah thuai tumin an inbuatsaih mek tih a sawi.
A thawh khatna atan China-a Sinovac Biotech Ltd. siam vaccine hi dose matkaduai 1.2 an dawng a, nakkum January thlaah dose maktaduai 1.8 an dawn belh leh an beisei tih President chuan a sawi. Indonesia hian August thla aṭang khan Sinovac vaccine hi a lo enchhin tawh a ni.
Vaccine an dawn hi sem chhuah a nih hmain an rama food and drug agency (BPOM) chuan an endik ve leh phawt ang.
Vaccine pek hmasak turah Queen Elizabeth II tel
Britain chuan Pfizer/ BioNTech vaccine a pawm hnuah semchhuah ṭan thuai a beisei a, vaccine pek hmasak tur zingah hian an ram lal, Queen Elizabeth II leh a pasal, Prince Philip te an tel.
Covid-19 vaccine hi tun karah pek chhuah ṭan tum a ni a, kum 80 chung lamte pek hmasak an ni ang. Pek hmasak turah hian damdawi lama thawkte, kum 80 chung lam leh care home-a thawkte dah an ni. Queen Elizabeth hi kum 94 niin, a pasal Prince Philip hi kum 99 a ni tawh a ni.
Vaccine hi sorkar chuan dose maktaduai 40 a order a, hei hi mi pakhat hnenah ṭum hnih, ni 21 danah pek tur a ni. Heng vaccine-te hi hospital 50 aṭangin pek chhuah phawt an ni dawn a ni.