Australia Bushfire : Fraser Island-a chengte insawnchhuak turin ti
Australia rama October thla laihawl aṭanga ram kang chu tun thlengin ṭhelh mit theih loin a la awm a, ram kang hian Australia rama World Heritage site, Fraser Island-a mihring chenna, Happy Valley lam a pan zel avangin he hmuna chengte chu insawnchhuak turin hriattir an ni.
Ram kang hi kar sarih liam taa phalna nei loa camp-a meichhem aṭanga rawn chhuak a ni a, kang ṭhelhtuten theihtawp chhuah mah se khua a ro avang leh, khaw a lum chhoh zel avangin an la ṭhelh mit thei lo. Kangmei chhuak hian ram hectare 84,000 vela zau a kang chhe tawh. Nimin khan kangṭhelhtu 100 chuang leh thlawhtheihna 25 hmangin ram kang ṭhelh hna hi thawh chhunzawm zel a ni.
Fraser Island hi khawvela sand island ber a ni a, kumtinin khualzin tam takin an tlawh ṭhin. He thliarkar khawchhak lam, Happy Valley-ah hian cheng nghet mi 200 vel an awm.
Nikuma Australia rama ram kang nasa tak a thlen ṭum, Black Summer tia sawi hialah khan Fraser Island pawh hi a lo kang tel tawh bawk. Hemi ṭuma ram kangah hian mi 34 an kang hlum a, chenna in 3,000 chuang a kang chhe tel bawk. Ramsa tam tak chu an kang hlum bawk a ni.